जावलाखेल युथ क्लब आहा! रारा गोल्डकपको फाइनलमा प्रवेश

पोखरा फागुन ७ : ए डिभिजन टोली जावलाखेल युथ क्लब २५ औँ आहा! रारा पोखरा गोल्डकप फुटबल प्रतियोगिता को फाइनलमा प्रवेश गरेको छ। पोखरा रंगशालामा बिहीबार भएको दोस्रो सेमिफाइनल खेलमा जावलाखेलले उज्वेकिस्तानको आभा एफसी लाई १–० ले पराजित गर्दै उपाधि नजिक पुगेको हो। योसँगै जावलाखेलले १४ वर्षपछि आहा! राराको फाइनल खेल्ने अवसर पाएको छ। खेल अत्यन्त प्रतिस्पर्धात्मक रहँदा, निर्णायक गोल खेलको ५२औँ मिनेटमा आत्मघाती रूपमा भयो। धरबेन्दर कुँवर ले लेफ्ट विङबाट डि–एरिया नजिक क्रस दिएको बल रोक्ने क्रममा आभाका डिफेन्डर कुशान गानिजानोभ मा ठोक्किएर बल गोलमा परिणत भयो। यस गोलले जावलाखेललाई अग्रता दिलायो र अन्तिम दुईमा पुग्न मद्दत गर्‍यो। ६५औँ मिनेटमा युवराज ढकाल ले मामुरोतोभलाई फाउल गरेपछि सिधै रातो कार्ड पाए। त्यसपछि जावलाखेल १० खेलाडीमा सीमित भयो, तर अग्रता कायम राख्दै फाइनल यात्रा सुरक्षित गर्‍यो। खेलमा आभाका जोकोचन राखिमोभ लाई प्लेयर अफ दि म्याच घोषित गरिएको छ। फाइनल खेल शनिबार आयोजक सहारा क्लब र जावलाखेल युथ क्लबबीच हुनेछ। सहारा क्लबले ९ वर्षपछि आहा! राराको फाइनलमा स्थान बनाएको हो।