काठमाडौं । गृहमन्त्री ओमप्रकाश अर्यालले राजनीतिक दबाबका कारण रोकिएका उच्च प्रोफाइल अनुसन्धान फाइलहरू खोल्ने महत्त्वपूर्ण घोषणा गरेका छन् । नेपाल प्रहरीको केन्द्रीय अनुसन्धान ब्युरो (सीआईबी) को निरीक्षणपछि पत्रकारहरूसँग कुरा गर्दै मन्त्री अर्यालले सो प्रतिबद्धता व्यक्त गरेका हुन् ।
गृहमन्त्री अर्यालको भनाइअनुसार, शान्ति सुरक्षाको अवस्था सुदृढ गर्न र आगामी निर्वाचनलाई सफलतापूर्वक सम्पन्न गर्नका लागि सुशासन पहिलो शर्त हो । उनले राजनीतिक हस्तक्षेपका कारण ओझेलमा परेका वा प्रभावित भएका सबै विषयवस्तुको छानबिन अगाडि बढ्ने स्पष्ट पारेका छन् ।
गृहमन्त्रीले दृढतापूर्वक भने, ‘राजनीतिक पहुँचका कारण जुन कुरा रोकिएका थिए वा गडबड गरिएका थिए, अब त्यस्तो चल्दैन।’
उनले थप व्याख्या गर्दै भने, ‘यो सरकारको मुख्य लक्ष्य नै सुशासन हो। सुशासनविना शान्ति सुरक्षा स्थापित हुन सक्दैन। शान्ति सुरक्षा सुनिश्चित नभएसम्म ६ महिनाभित्र तोकिएको निर्वाचन सम्पन्न गर्न सम्भव हुँदैन।’
गृहमन्त्री अर्यालको यो कदमले ठूला र संवेदनशील भ्रष्टाचार वा अनियमितताका मुद्दाहरूको अनुसन्धानले गति लिने र दण्डहीनतालाई न्यूनीकरण गर्न मद्दत पुग्ने अपेक्षा गरिएको छ।
