काठमाडौं । फिफा विश्वकप २०२६ को सेमिफाइनलमा अर्जेन्टिनासँग अन्तिम क्षणमा २–१ गोलअन्तरले पराजित भएपछि इङ्गल्यान्डका पूर्वकप्तान डेभिड बेकह्यामले टोलीको हारप्रति दुःख व्यक्त गर्दै खेलाडीहरूको प्रदर्शनप्रति गर्व व्यक्त गरेका छन्।
सामाजिक सञ्जाल इन्स्टाग्राममार्फत प्रतिक्रिया जनाउँदै बेकह्यामले हारले सम्पूर्ण इङ्गल्यान्डवासीको मन दुखाएको भए पनि विश्वकप अभियानले देशलाई धेरै अविस्मरणीय क्षण दिएको उल्लेख गरेका छन्। उनले खेलाडीहरूले प्रतियोगिताभर देखाएको समर्पण, संघर्ष र मेहनतको प्रशंसा गर्दै टोली, समर्थक तथा सम्पूर्ण देशलाई धन्यवाद दिएका छन्।
बेकह्यामले आफ्नो सन्देशमा लेखेका छन्, “यो हारले हामी सबैको मन दुखाएको छ। तर यो विश्वकपले हामीलाई प्रेरणा दिने र सधैं सम्झनामा रहने धेरै सुन्दर क्षणहरू दिएको छ। हाम्रो टोली, समर्थक र देशलाई धन्यवाद।”
इङ्गल्यान्डका सर्वकालीन उत्कृष्ट फुटबलरमध्ये एक मानिने बेकह्यामले हारका बाबजुद राष्ट्रिय टोलीले भविष्यका लागि आशा जगाएको पनि संकेत गरेका छन्। उनको प्रतिक्रियापछि हजारौं समर्थकले पनि सामाजिक सञ्जालमार्फत टोलीप्रति समर्थन जनाएका छन्।
एटलान्टास्थित मर्सिडिज बेन्ज स्टेडियममा सम्पन्न दोस्रो सेमिफाइनल निकै प्रतिस्पर्धात्मक बनेको थियो। पहिलो हाफमा दुवै टोलीले केही उत्कृष्ट अवसर सिर्जना गरे पनि गोल हुन सकेन र खेल गोलरहित बराबरीमा सकियो।
दोस्रो हाफको ५५औँ मिनेटमा मोर्गन रोजर्सको उत्कृष्ट पासमा एन्थोनी गोर्डनले गोल गर्दै इङ्गल्यान्डलाई १–० को अग्रता दिलाएका थिए। अग्रता लिएपछि इङ्गल्यान्डले रक्षात्मक रणनीति अपनाउँदै खेल नियन्त्रणमा राख्ने प्रयास गर्यो।
तर त्यसपछि अर्जेन्टिनाले लगातार दबाब बढायो। कप्तान लियोनल मेसीको नेतृत्वमा अर्जेन्टिनाले बलमाथि नियन्त्रण कायम राख्दै इङ्गल्यान्डको रक्षापंक्तिलाई निरन्तर चुनौती दियो। खेलको ८५औँ मिनेटमा मेसीले उपलब्ध गराएको अवसरलाई एन्जो फर्नान्डेजले सदुपयोग गर्दै बराबरी गोल फर्काएपछि खेल १–१ को अवस्थामा पुग्यो।
त्यसपछि खेल अतिरिक्त समयमा जाने अनुमान गरिएका बेला इन्जुरी समयको दोस्रो मिनेटमा मेसीले दायाँ विङबाट दिएको उत्कृष्ट क्रसमा वैकल्पिक खेलाडी लाउटारो मार्टिनेजले शक्तिशाली हेडरमार्फत निर्णायक गोल गर्दै अर्जेन्टिनालाई २–१ को रोमाञ्चक जित दिलाए।
अन्तिम समयमा गोल खाएपछि इङ्गल्यान्डले बराबरीको प्रयास गरे पनि अर्जेन्टिनाको रक्षापंक्तिलाई भेदन गर्न सकेन। रेफ्रीको अन्तिम सिट्टीसँगै अर्जेन्टिनाले लगातार दोस्रो पटक विश्वकपको फाइनलमा स्थान सुरक्षित गर्यो।
यस जितसँगै साविक विजेता अर्जेन्टिनाले उपाधिका लागि युरोपेली च्याम्पियन स्पेनसँग आइतबार अमेरिकाको न्यु जर्सीस्थित मेटलाइफ स्टेडियममा प्रतिस्पर्धा गर्नेछ। उता, सेमिफाइनलमा पराजित इङ्गल्यान्डले शनिबार तेस्रो स्थानका लागि फ्रान्ससँग खेल्नेछ।
विश्वकप उपाधिको सपना अन्तिम चारमै टुंगिए पनि इङ्गल्यान्डको युवा टोलीले प्रतियोगिताभर गरेको प्रदर्शनलाई सकारात्मक रूपमा हेरिएको छ। पूर्वकप्तान बेकह्यामको सन्देशले पनि हारका बाबजुद टोलीप्रति विश्वास र सम्मान कायम रहेको संकेत दिएको छ।



































