काठमाडौं । चालु आर्थिक वर्षको साउनदेखि असोजसम्म विदेश अध्ययनका लागि नेपाली युवाहरूले करिब ४३ अर्ब रुपैयाँ खर्च गरेका छन् । नेपाल राष्ट्र बैंकका तथ्यांकअनुसार, सेवा खाताभित्रको कुल भ्रमण खर्च १६.४ प्रतिशतले बढेर ६४ अर्ब ५९ करोड रुपैयाँ पुगेको हो ।
यसमा सबैभन्दा ठूलो हिस्सा शिक्षा क्षेत्रमा भएको छ, जसको रकम ४२ अर्ब ९६ करोड रुपैयाँ पुगेको छ । गत वर्षको सोही अवधिको ३२ अर्ब २२ करोडभन्दा बढी हो ।
समीक्षा अवधिमा खुद सेवा आय ३२ अर्ब ६८ करोड रुपैयाँ घाटामा देखिएको छ, जबकि गत वर्ष सोही अवधिमा यो २३ अर्ब १ करोड रुपैयाँ घाटामा थियो ।
त्यस्तै, सेवा खाताभित्र भ्रमण आय ८।१ प्रतिशतले बढेर १९ अर्ब १९ करोड रुपैयाँ पुगेको छ, गत वर्षको १७ अर्ब ७६ करोडको तुलनामा उल्लेखनीय वृद्धि देखिएको छ ।
