काठमाडौं । तीन वर्षीया गरिमा चौधरीको बलात्कारपछि हत्या भएको घटनाका दोषीलाई कडा कारबाहीको माग गर्दै शुक्रबार काठमाडौंको माइतीघर मण्डलामा प्रदर्शन गरिएको छ।
स्वतन्त्र आमा नेपालको आयोजनामा भएको प्रदर्शनमा महिला तथा विभिन्न क्षेत्रका नागरिक सहभागी भएका थिए। प्रदर्शनकारीहरूले बालिकामाथि भएको जघन्य अपराधको निष्पक्ष छानबिन गरी घटनामा संलग्न दोषीलाई कडा कानुनी कारबाही गर्न माग गरेका छन्।
उनीहरूले बालबालिकामाथि हुने यौन हिंसा तथा जघन्य अपराधका घटनामा राज्य गम्भीर बन्नुपर्नेमा जोड दिएका थिए। प्रदर्शनकारीहरूले पीडित परिवारलाई न्यायको अनुभूति हुने गरी अनुसन्धान तथा कानुनी प्रक्रिया अघि बढाउन र दोषीलाई कानुनबमोजिम कडा सजाय दिन माग गरे।
माइतीघर मण्डलामा भेला भएका महिलाहरूले विभिन्न नारासहित प्रदर्शन गर्दै गरिमाका लागि न्यायको आवाज उठाएका थिए। उनीहरूले बालबालिकाको सुरक्षा सुनिश्चित गर्न सरकार तथा सम्बन्धित निकाय थप जिम्मेवार बन्नुपर्ने बताएका छन्।
प्रदर्शनकारीहरूले यस्ता घटनाको निष्पक्ष अनुसन्धानसँगै बालबालिकामाथि हुने हिंसा तथा यौन दुर्व्यवहार रोक्न प्रभावकारी सुरक्षा व्यवस्था, जनचेतनामूलक कार्यक्रम र कडा कानुनी कार्यान्वयन आवश्यक रहेको बताएका छन्।
गरिमा चौधरीको घटनामा न्यायको माग गर्दै गरिएको प्रदर्शनले बालबालिकामाथि हुने हिंसाविरुद्ध सामाजिक दबाब सिर्जना गर्नुपर्ने आवश्यकता औँल्याएको छ। प्रदर्शनकारीहरूले घटनामा संलग्न दोषीमाथि निष्पक्ष अनुसन्धान र कानुनी कारबाही नभएसम्म आवाज उठाइरहने बताएका छन्।



































