काठमाडौं । आईसीसी क्रिकेट विश्वकप लिग–२ अन्तर्गत घरेलु टोली नेदरल्यान्ड्ससँग ६ विकेटले पराजित भएपछि नेपालको शीर्ष चारभित्र रहेर विश्वकप छनोटमा सोझै पुग्ने सम्भावना थप कमजोर बनेको छ। लगातार दोस्रो खेलमा नेपाल १५७ रनमै समेटिँदा ब्याटिङ र बलिङ दुवै विभागमा टोलीको प्रदर्शन निराशाजनक रह्यो।
बिहीबार टस हारेर पहिले ब्याटिङ गरेको नेपाल ४४.४ ओभरमा सबै विकेट गुमाउँदै १५७ रनमा समेटियो। कप्तान रोहितकुमार पौडेलले सर्वाधिक ३१ रन बनाए भने दीपेन्द्रसिंह ऐरीले ३०, गुल्सनकुमार झाले २०, करण केसीले १८, आसिफ शेखले १६ र सोमपाल कामीले १५ रन जोडे। तर कुनै पनि ब्याटरले इनिङ्सलाई लामो बनाउन नसक्दा नेपाल प्रतिस्पर्धात्मक लक्ष्य खडा गर्न असफल भयो।
नेपालले सुरुआत राम्रो गरे पनि त्यसलाई ठूलो स्कोरमा रूपान्तरण गर्न सकेन। नियमित अन्तरालमा विकेट गुमाउँदा मध्यमक्रम पनि दबाबमा रह्यो र टोली फेरि एकपटक कमजोर ब्याटिङका कारण संकटमा पर्यो।
१५८ रनको लक्ष्य पछ्याएको नेदरल्यान्ड्सले ४४.१ ओभरमा ४ विकेट गुमाएर सहज जित निकाल्यो। कप्तान स्कट एडवर्ड्सले संयमित इनिङ्स खेल्दै टोलीलाई जित दिलाए। नेपाली बलरहरूले सुरुआती सफलता निकाल्न नसक्दा डच टोलीले खेलभर नियन्त्रण कायम राख्यो। बलिङसँगै फिल्डिङमा पनि नेपालले अपेक्षित प्रदर्शन गर्न सकेन।
यसअघि मंगलबार नामिबियाविरुद्धको खेलमा पनि नेपाल १५७ रनमै अलआउट भएको थियो। १५८ रनको लक्ष्य पछ्याएको नामिबियाले ३७.४ ओभरमा २ विकेट गुमाएर सहज जित निकालेको थियो। कप्तान जान फ्राइलिंक ७८ रनमा अविजित रहे भने माइकल भान लिंगनले ५१ रन बनाएका थिए।
लगातार कमजोर ब्याटिङ प्रदर्शनका कारण नेपाल लिग–२ को अंकतालिकामा पछि पर्दै गएको छ। ३० खेलबाट २४ अंक जोडेको नेपाल आठ टोली सहभागी प्रतियोगिताको पाँचौं स्थानमा छ। २९ खेलबाट ३४ अंक जोडेको नेदरल्यान्ड्स तेस्रो स्थानमा उक्लिएको छ। यस हारसँगै नेपालको शीर्ष चारभित्र रहेर विश्वकप छनोटमा सोझै स्थान बनाउने सम्भावना अझ कठिन बनेको छ।



































