काठमाडौं । स्पेनले अर्जेन्टिनालाई अतिरिक्त समयमा १–० ले पराजित गर्दै फिफा विश्वकप २०२६ को उपाधि जितेको छ। अमेरिकाको न्यु जर्सीस्थित मेटलाइफ स्टेडियममा सोमबार बिहान सम्पन्न रोमाञ्चक फाइनलमा स्पेनले अतिरिक्त समयमा गरेको एकमात्र गोलको मद्दतमा विश्व फुटबलको सर्वोच्च उपाधि आफ्नो नाम गरेको हो।
निर्धारित ९० मिनेटको खेलमा दुवै टोलीले गोल गर्ने केही उत्कृष्ट अवसर सिर्जना गरे पनि कुनै पनि टोलीले जाली चुमाउन सकेन। त्यसपछि खेल अतिरिक्त समयमा पुगेको थियो।
स्पेनका लागि खेलको १०६औँ मिनेटमा फरवार्ड टोरेसले निर्णायक गोल गर्दै टोलीलाई ऐतिहासिक जित दिलाए। उक्त गोल नै खेलको एकमात्र गोल सावित भयो। त्यसपछि अर्जेन्टिनाले बराबरी गोलका लागि लगातार आक्रमण गरे पनि स्पेनको सुदृढ रक्षापंक्तिलाई तोड्न सकेन।
यससँगै स्पेनले सन् २०१० पछि पहिलो पटक विश्वकपको उपाधि जित्दै दोस्रो पटक विश्व च्याम्पियन बन्ने गौरव हासिल गरेको छ। युवा र अनुभवी खेलाडीको सन्तुलित प्रदर्शनका कारण स्पेनले प्रतियोगिताभर उत्कृष्ट लय कायम राख्दै उपाधिसम्मको यात्रा तय गरेको हो।
यता अर्जेन्टिनाको लगातार ठूलो प्रतियोगितामा उपाधि जित्ने अभियान भने यसपटक रोकिएको छ। सन् २०२१ र २०२४ को कोपा अमेरिका तथा २०२२ को विश्वकप जितेर लगातार सफलता हासिल गरेको अर्जेन्टिना यसपटक विश्वकपको फाइनलमा पराजित हुँदै उपाधिविहीन बनेको हो।
प्रतियोगिताभर दुवै टोलीले आकर्षक प्रदर्शन गरेका थिए। स्पेनले सेमिफाइनलमा फ्रान्सलाई पराजित गर्दै फाइनल यात्रा तय गरेको थियो भने अर्जेन्टिनाले इंग्ल्यान्डलाई हराउँदै उपाधि भिडन्तमा स्थान बनाएको थियो। फाइनलमा भने स्पेनले धैर्यपूर्ण खेल र अतिरिक्त समयमा गरेको निर्णायक गोलका आधारमा विश्व फुटबलको सर्वोच्च उपाधि उचाल्न सफल भयो।


































