काठमाडौं । जीवन बिमा कम्पनीहरुले ६ महिनामा झन्डै १ खर्ब रुपैयाँको व्यापार गरेका छन् । चालु आर्थिक वर्ष २०८२/८३ को साउनदेखि पुससम्ममा जीवन बिमा कम्पनीहरुले ९४ अर्बभन्दा बढी बिमाशुल्क संकलन गरेका हुन् ।
बिमा प्राधिकरणले बुधबार प्रकाशन गरेको तथ्यांकअनुसार सञ्चालनमा रहेका १४ बिमा कम्पनीले १ करोड १४ लाख ५५ हजार २३५ वटा बिमा पोलिसी बिक्री गरी ९४ अर्ब ३७ करोड ९७ लाख रुपैयाँ बिमाशुल्क संकलन गरेका छन् ।
समीक्षा अवधिमा सबैभन्दा धेरै नेपाल लाइफ इन्स्योरेन्सले कुल बिमाशुल्क संकलन गरेको छ । कम्पनीले यो अवधिमा २५ अर्ब ५१ करोड रुपैयाँ कुल बिमाशुल्क संकलन गरेको हो । यो रकम सञ्चालनमा रहेका सबै कम्पनीहरुले गर्ने व्यापारको २७ प्रतिशतभन्दा धेरै हो ।
त्यस्तै नेसनल लाइफले ११ अर्ब ३७ करोड रुपैयाँ कुल बिमाशुल्क संकलन गरेको छ भने एलआइसी नेपालले १० अर्ब २२ करोड रुपैयाँ कुल बिमाशुल्क संकलन गरेको छ । हिमालयन लाइफले ८ अर्ब ६२ करोड रुपैयाँ कुल बिमाशुल्क संकलन गरेको प्राधिकरणको तथ्यांकमा उल्लेख छ ।
राष्ट्रिय जीवन बिमा कम्पनीले ६ अर्ब ३३ करोड रुपैयाँ कुल बिमाशुल्क संकलन गरेको छ भने सूर्यज्योति लाइफले ५ अर्ब ६६ करोड, एसियन लाइफले ४ अर्ब ६४ करोड र सिटिजन लाइफले ४ अर्ब ४ करोड रुपैयाँ कुल बिमाशुल्क संकलन गरेको छ ।
त्यस्तै सानिमा रिलायन्स लाइफले ३ अर्ब ६३ करोड, मेट लाइफले ३ अर्ब २४ करोड, आइएमई लाइफले ३ अर्ब १८ करोड, रिलायबल नेपाल लाइफले २ अर्ब ९८ करोड, प्रभु महालक्ष्मीले २ अर्ब ७९ करोड र सन नेपाल लाइफले २ अर्ब ११ करोड रुपैयाँ कुल बिमाशुल्क संकलन गरेको छ ।
