काठमाडौं, साउन २९ / नेपाली कांग्रेसको संस्थापन इतर पक्षले आयोजना गरेको तीनदिने राष्ट्रिय भेला आजदेखि काठमाडौंको सुकेधारास्थित मिराकल पार्टी प्यालेसमा सुरु भएको छ। भेला साउन २९ देखि ३१ गतेसम्म सञ्चालन हुनेछ।
राष्ट्रिय भेला आयोजक समितिको संयोजक डा. शशांक कोइराला रहेका छन्। पहिलो दिन उद्घाटन सत्र र त्यसपछि दुई दिन बन्दसत्र सञ्चालन गर्ने कार्यतालिका छ। उद्घाटन कार्यक्रम शुक्रबार दिउँसो १ बजेबाट सुरु हुने तय गरिएको थियो।
भेलामा कांग्रेसका पूर्वसभापति एवं पूर्वप्रधानमन्त्री शेरबहादुर देउवा प्रमुख अतिथिका रूपमा सहभागी हुने र उनले नै उद्घाटन गर्ने यसअघि आयोजक पक्षले जनाएको थियो। देउवा साउन २६ गते विदेशबाट नेपाल फर्किने कार्यक्रमबारे पनि आयोजकले जानकारी दिएको थियो।
भेलामा कांग्रेसको वर्तमान राजनीतिक अवस्था, पार्टीभित्रको विवाद, संगठनात्मक अवस्था तथा आगामी राजनीतिक रणनीतिबारे छलफल हुने बताइएको छ। आयोजक पक्षका अनुसार करिब ४ हजार ६ सय प्रतिनिधि सहभागी हुने अपेक्षा गरिएको छ भने सहभागी संख्या ५ हजारभन्दा बढी पुग्न सक्ने अनुमान गरिएको थियो।
इतर पक्षले यसअघि काठमाडौंको चुनदेवीमा सम्पर्क कार्यालय स्थापना गरेर समानान्तर राजनीतिक गतिविधि अघि बढाउँदै आएको छ। शशांक कोइरालाको नेतृत्वमा राष्ट्रिय भेला आयोजक समिति गठन भएपछि यो समूहले आफ्नो गतिविधिलाई थप व्यवस्थित बनाएको हो।
यस भेलालाई कांग्रेसभित्रको पछिल्लो विवाद र पार्टी एकताको सम्भावनाका दृष्टिले पनि महत्वपूर्ण मानिएको छ। शशांक कोइरालाले यसअघि कांग्रेस विभाजित अवस्थामा पुगेको भन्दै पार्टी एकता नै आवश्यक रहेको धारणा सार्वजनिक गरिसकेका छन्।
तीन दिनसम्म चल्ने भेलाबाट कांग्रेसको आन्तरिक विवाद, नेतृत्व र आगामी राजनीतिक दिशाबारे इतर पक्षले कस्तो निर्णय लिन्छ भन्ने विषयलाई राजनीतिक वृत्तमा चासोका साथ हेरिएको छ।



































