भक्तपुर । प्रतिनिधिसभा निर्वाचनका लागि आवश्यक मतपत्र छपाइ अहिले अन्तिम चरणमा पुगेको छ । जनक शिक्षा सामग्री केन्द्र लिमिटेडले बाँकी रहेका करिब पाँच लाख मतपत्र आजै छपाइ सकिने जनाएको छ, जसले निर्वाचन तयारीलाई थप गति दिएको छद ।
केन्द्रका कार्यकारी प्रबन्ध सञ्चालक यदुनाथ पौडेलका अनुसार बागमती प्रदेशका लागि आवश्यक मतपत्र आज साँझसम्म तयार हुनेछ। प्रत्यक्षतर्फ छाप्नुपर्ने दुई करोड तीन लाख मतपत्रमध्ये अब केही मात्र बाँकी रहेकाले ४२ दिनको कार्यतालिका बनाएर सुरु गरिएको काम ४० दिनमै सम्पन्न हुने अवस्थामा पुगेको उनले बताए।
छपाइ सम्पन्न भएपछि भोलिसम्म सबै मतपत्रको प्याकिङ सकाएर बाँकी जिल्लामा ढुवानी गरिने तयारी गरिएको छ। दैनिक १३ देखि १५ लाख मतपत्र छपाइ गर्दै लक्ष्यभन्दा अघि नै काम सम्पन्न गरिनु केन्द्रका लागि उत्साहजनक उपलब्धि बनेको छ।
निर्वाचन आयोगका लागि छापिएका १० लाख नमूना मतपत्र देशका विभिन्न स्थानमा पठाइसकिएको जानकारी पनि केन्द्रले दिएको छ। समानुपातिकतर्फका दुई करोड आठ लाख ३० हजार मतपत्र छापेर प्याकिङ गरिसकिएको र जिल्लाहरूमा पठाउने क्रम जारी रहेको बताइएको छ।
कर्णाली र सुदूरपश्चिम प्रदेशमा आवश्यक सबै मतपत्र पुगिसकेको छ भने बाँकी क्षेत्रमा पनि निर्धारित समयसीमाभित्र मतपत्र पुर्याउने तयारी तीव्र पारिएको छ।
निर्वाचन नजिकिँदै जाँदा मतपत्र छपाइ समयमै सम्पन्न हुनु लोकतान्त्रिक प्रक्रियाप्रति जनविश्वास बलियो बनाउने सकारात्मक संकेतका रूपमा हेरिएको छ।
